అస్త్ర తంత్ర : ఆండ్రాయిడ్ ఫ్రెండ్!

Sakshi | Updated: November 12, 2013 23:35 (IST)

 అపాయాలు చెప్పి రావు. ఊహించని విధంగా విపత్కరమైన పరిస్థితులు ఎదుర్కోవాల్సి రావొచ్చు. వాటిని ఎదుర్కొనే శారీరక శక్తి లేకపోవచ్చు. అయితే కాస్తంత జాగ్రత్తగా ఉంటే నేర్పుగా తప్పించుకోవడానికి అవకాశం ఉంటుంది. అలాంటి నేర్పులలో ఒకటి... మొబైల్ అప్లికేషన్‌లు వాడటం. చాలామంది మహిళలు ఆండ్రాయిడ్, ఐఓఎస్ స్మార్ట్ ఫోన్‌లు వాడుతున్నారు. అందుకే వారి రక్షణను యాప్స్‌లో పొందుపరిచాయి మొబైల్ సంస్థలు. వీటిని ఇన్‌స్టాల్ చేసుకొని, కొన్ని ముఖ్యమైన నంబర్లను అందులో ఫీడ్ చేసుకుంటే... భరోసా మీ వెంట ఉన్నట్టే.

 ‘నిర్భయ’ అప్లికేషన్: దేశరాజధానిలో అకృత్యానికి గురైన ‘నిర్భయ’ను గుర్తుచేస్తూ మహిళలకు సహాయకారిగా ఉండేందుకు రూపొందించిన  అప్లికేషన్ ఇది. ఆండ్రాయిడ్ ఫోన్లపై పనిచేసే ఈ అప్లికేషన్‌ను ఇన్‌స్టాల్ చేసుకుని, తల్లిదండ్రులు లేదా సంరక్షకుల నంబర్‌ను ఫీడ్ చేసుకుంటే చాలు... ఆపత్కాలంలో ఒకే ఒక్క క్లిక్‌తో వారికి మెసేజ్ లేదా ఫోన్‌కాల్ వెళ్లిపోతుంది.

 ఫైట్‌బ్యాక్: ఇది కూడా నిర్భయ లాంటి మరో అప్లికేషన్. ఒక్కసారి టచ్ చేస్తే, వెంటనే మీ వాళ్లకు కాల్ వెళ్లిపోతుంది. మిస్సింగ్ కేసుల్లో తమకు ఈ అప్లికేషన్ ఉపయోగపడుతోందని పోలీసులు సైతం చెబుతున్నారు. ఇంటర్నెట్‌తో కనెక్టయ్యి ఉండే ఈ అప్లికేషన్... లొకేషన్ ఫైండ్ చేయడానికి ఉపయోగపడుతుంది.

 హెల్ప్ అలర్ట్: అహ్మదాబాద్‌కు చెందిన దేశీయ అప్లికేషన్ డెవలపర్ పయనీర్ వెబ్‌సిస్టమ్స్ వారు ఈ అప్లికేషన్‌ను డెవలప్ చేశారు. విపత్కర పరిస్థితి ఎదురైనప్పుడు, మెడికల్ ఎమర్జెన్సీలో, దాడి, కిడ్నాపింగ్ సమయాల్లో ఉపయోగపడే విధంగా ఈ అప్లికేషన్‌ను తీర్చిదిద్దారు. ఆండ్రాయిడ్ ఫోన్లపై ఇది పనిచేస్తుంది.

 ఐ ఫాలో: ఇది అన్నిటికంటే బెస్ట్ యాప్. దీనిని అన్నిటిలాగే ఇన్‌స్టాల్ చేసుకోవాలి. ప్రమాదం వచ్చినప్పుడు కొన్నిసార్లు ఫోన్ చేసేంత, యాప్‌ను క్లిక్ చేసేంత సమయం ఉండదు కదా! అందుకే... ఈ యాప్‌ని అసలు క్లిక్ చేయాల్సిన పని కూడా లేదు. జస్ట్, మొబైల్‌ను కదిలిస్తే చాలు... అందులో ఉన్న నంబర్లకు ఈ అప్లికేషన్ ద్వారా కాల్స్ వెళ్లిపోతాయి. ఇది సహాయపడే తీరును చూసి నేషనల్ అసోసియేషన్ ఆఫ్ సాఫ్ట్‌వేర్ అండ్ సర్వీసెస్ కంపెనీస్ (నాస్కామ్) ఈ అప్లికేషన్ రూపకర్తలను సత్కరించింది.