వంటగదిలో వేలాడే మినీ ఉద్యానవనం

Sakshi | Updated: November 22, 2013 05:36 (IST)

 వెయ్యి చదరపు గజాల్లో ఇల్లు... మధ్య తరగతి బడ్జెట్‌కి అదే స్వర్గసీమ. ఈ స్వర్గసీమలో వంటగది కేటాయింపు పదిశాతానికి లోపే ఉంటుంది. స్టవ్, గ్యాస్ సిలిండర్, మిక్సీ, గ్రైండర్, రైస్ కుకర్, అవెన్‌లు నిర్మొహమాటంగా వాటికి కావల్సినంత జాగాను ఆక్రమించుకుంటాయి. ఇక వంటకు కావల్సిన దినుసులు, వండాల్సిన పాత్రలు, వడ్డించాల్సిన రొటీన్ డిన్నర్‌సెట్‌లు...

అన్నీ ఇక్కడే. గోడలను అంగుళం కూడా వదలకుండా షెల్ఫులతో నింపేస్తే ఆ అరల్లో వంటదినుసులు వగైరాలన్నీ సర్దుకుంటాయి. కానీ వండడానికి వాడే పాత్రలకు ఎన్ని అరలున్నా సరిపోయినట్లు అనిపించదు. ఇక్కడ కనిపిస్తున్న పాట్ హ్యాంగర్‌లను చూస్తే... వంటగదిలోకి వెళ్తున్నట్లు కాక, వంటపాత్రలను అమ్మే దుకాణంలోకి అడుగు పెడుతున్నట్లు ఉంది. కానీ ఈ అమరిక వంటగదికి సౌకర్యంగానే ఉంటుంది. ఊయలలూగే రాక్‌లతో మరో ఉపయోగం కూడా ఉంది. కడిగిన వెంటనే పాత్రలను యథాతథంగా ఈ హ్యాంగర్‌కి తగిలించుకోవచ్చు.

శుభ్రం చేసిన పాత్రలను తేమ ఆరేవరకు నిల్వ చేసే జల్లెడలాంటి బౌల్ అవసరం ఉండదు. వేళ్లాడే ఉద్యానవనాలను రోజూ చూడడం ఎలాగూ సాధ్యం కాదు. పాట్ హ్యాంగర్‌లకే చక్కటి మనీప్లాంట్ తీగ అల్లించుకుంటే వేలాడే మినీ ఉద్యానవనం మీ వంటగదిలోనే పెరుగుతుంది మరి!